Statssekretær vitjar fagskulen i akvakultur

Teknisk fagskule for akvakultur vert gjennomført med samlingar over 3 år. No nærmar studiet seg slutten og den valfrie modulen Akvakulturleiing er den siste innhaldsbolken som skal gjennomførast. Faginnhaldet i den valfrie modulen vert i hovudsak presentert av folk som til dagleg har føling med dei problemstillingane studentane skal kunna noko om, når studiet er ferdig.

I veke 18 var studentane samla på Austevoll vgs. til ei veke med eit interessant program. Statssekretær i Fiskeridepartementet (lokalt uttrykk for Nærings- og fiskeridep.) Amund Drønen Ringdal snakka engasjert om regjeringa sine framtidsvyer for havbruk. Ein student konkluderte med at han truleg er rett mann på rett plass utan omsyn til partitilknyting. Direktør i Fiskeridirektoratet Jens Chr. Holm snakka med dei om myndighetskrav og akvakulturledelse og ordføraren i Austevoll la fram kommunen sine planar og strategiar for satsinga på akvakultur lokalt. Skulen sin nære nabo, Havforskninga sin avdeling i Austevoll, representert ved stasjonsleiar Torfinn Grav, var der og delte sine tankar om korleis forskning kan vera nyttig for oss alle. Dagane vart toppa med at produksjonssjef i Lerøy/Sjøtroll, Hildebjørg Åsvang, fortalde om sin kvardag.

Stor takk til forelesarane som brukte si dyrebare tid til å dela kunnskapen sin og tankane sine med oss!